كيف تختار اللزوجة المناسبة لزيت محرك سيارتك؟؟

هذا السؤال يشغل بال الكثير من الناس... كيف نختار اللزوجة المناسبة لزيت المحرك؟؟

إجابة هذا السؤال سهلة جدا... ولا خلاف عليها

دائما.. اللزوجة المناسبة هي المكتوبة في كتيب المالك الخاص بسيارتك...

وإذا كنت تختار اللزوجة بناء على تجربة شخص آخر أو كلام سمعته من أناس آخرين.. فنرجو أن تغير هذه الفكرة وتتصفح كتيب المالك الخاص بسيارتك... لإنه ببساطة لا يوجد من هو أكثر معرفة بسيارتك من صانعها.. وتوصيات نوع ولزوجة الزيت ليست مكتوبة من فراغ.. إنما سبقتها تجارب كثيرة قام بها الصانع قبل إنتاج المحرك بشكل تجاري ، ومنها أوصى بالزيت المناسب.

المشكلة أن بعض الناس تفتح الكتيب وتقرأ ما فيه.. ولكنهم مازالوا محتارين.. وهذا المقال مكتوب خصيصاً لهم... وستزول هذه الحيرة عند قراءته إن شاء الله.

نريد أن نؤكد على نقطة مهمة جدا ...

زيت المحرك ليس لزوجة فقط...أي أن اللزوجة ليست هي المعيار الوحيد لاختيار الزيت.. ولكن هناك معايير أخرى يجب أن تؤخذ في الاعتبار عند اختيار الزيت المناسب... مثل مستوى الأداء أو الجودة بالإضافة لنوع زيت الأساس.. 

وفعليا.. هذه المعايير هي العامل الفارق فعلا في تفضيل زيت عن آخر..  وليست اللزوجة.. بل هي أهم منها بكثير..

إذا أردت معرفة المزيد من التفاصيل عن مستوى الأداء.. فقد يفيدك هذا المقال:

مستوى الأداء.. الجندي المجهول في زيوت المحركات

دعنا أولا نتعلم كيف نقرأ كتيب المالك لمعرفة اللزوجة...

كل ما عليك هو أن تفتح قسم الصيانة في الكتيب.. وتبحث عن صفحة تغيير الزيت... 

إذا لم تجد مواصفات الزيت المطلوب في هذه الصفحة.. فهناك احتمال كبير أن تكون مواصفات كل الزيوت والسوائل الخاصة بالسيارة مكتوبة في قسم آخر (خاص بالمواصفات).. وغالبا ما يكون آخر قسم في الكتيب.

إذا كانت سيارتك أوروبية .. فغالبا لن تجد مواصفات الزيت في كتيب المالك، فأغلب السيارات الأوروبية تكتب هذه المواصفات في كتيب منفصل خاص بالصيانة.. ارجع له رجاء.

حسنا..

في أغلب الكتيبات... ستجد رسماً موضح فيه اللزوجات المسموحة ومتى تستخدمها..

مثل هذا...

أو هذا..

انظر معنا جيدا لهذه الرسومات ..

ستجد تدريجاً في أحد أجناب الرسم (في الأسفل أو الأعلى أو على اليمين أو اليسار).. المهم أن ذلك التدريج يوضح درجة حرارة الجو الخارجي.

ستجد أيضا عدة مستطيلات أو خطوط أو أسهم... وكل واحد منها مكتوب عليه رقم (أو عدة أرقام) للزوجة... والملفت للنظر أن هذه الخطوط قد لا تبدأ أو تنتهي في نفس الأماكن ..

هذه الخطوط توضح درجات الحرارة الخارجية التي يجوز أن نشغل فيها الزيت... بمعنى أن لزوجة 20W-40 مثلاً تبدأ من يسار الرسم مع درجة حرارة (0 °م) على التدريج.. وتنتهي مع درجة حرارة (40 °م)

لكي نختار بشكل صحيح.. نقوم بالتالي:

1- نشوف على التدريج الموجود فين درجة الحرارة بتاعت الجو اللي المفروض العربية هتشتغل فيه.. وفي أغلب الحالات .. جو مصر ما بتقلش درجة الحرارة فيه في الشتا عن صفر م، وفي الصيف غالبا بتبقى في حدود الـ40 أو أكتر.

2- نشوف على الرسم فين الخطوط أو المستطيلات بتاعت الزيوت اللي بتتقاطع مع المدى اللي حددناه... لازم الخط اللي بيتقاطع مع المدى يكون مغطيه كله... مش حتة منه بس..

مثلا..

حسب الرسمة اللي فوق دي.. اللي ما ينفعش مثلا نستخدم زيت بدرجة 10W-30.. 

لو عايز تعرف تفاصيل أكتر عن معنى درجات اللزوجة دي والفروق ما بينها.. التفاصيل دي هتلاقيها في المشاركة الجاية..

طيب .. أحيانا .. ممكن نلاقي أكتر من درجة لزوجة ممكن تشتغل معانا في مدى درجات الحرارة اللي حددناه... نعمل إيه؟

الحالة دي موجودة كتير في الكتالوجات... بمعنى إن الكتالوج يكون مديلك أكثر من درجة لزوجة وكلهم ينفعوا يشتغلوا في الجو اللي العربية ماشية فيه...

في الحالة دي نختار اللزوجة ازاي؟؟؟

قبل ما أجاوبك .. عايزك تعرف شوية حاجات بسيطة...

1- بشكل عام... الزيوت اللي لزوجتها عالية بتدي حماية أعلى من الزيوت الخفيفة.. خصوصا مع وجود أحمال عالية أو مع الحرارة العالية.. 

بس في المقابل .. الزيوت اللزجة بتعمل مقاومة داخلية كبيرة في الموتور.. وبالتالي ده بيخلي استهلاك البنزين أعلى.. ده غير إن اللزوجة العالية معناها سرعة انسياب أبطأ.. ودي ممكن تبقى مشكلة مع بداية تشغيل الموتور وفي الجو البارد بالذات (الجو البارد هو اللي أقل من صفر °م).

الكلام ده تقدر تقول عكسه تماما في الزيوت الخفيفة.

الصورة دي بتبين الفرق في الانسياب بين اللزوجة العالية والمنخفضة.. ومتقاسة في درجة حرارة 35 تحت الصفر

2- عمرك ما هتلاقي كل المميزات في منتج واحد... ده على فكرة مبدأ عالمي... 

لإن لو حصل وكان ممكن إننا نعمل منتج فيه كل المميزات فلا يمكن يكون رخيص.. وهتلاقي نفسك بتدفع تمن حاجات انت مش مستفيد بيها.. وساعتها مش هيبقى فيه منتجات منافسة في السوق.. وده معناه انهيار الاقتصاد على مستوى العالم.

طيب .. بعد المعلومات دي أقدر أجاوبك .. إزاي نختار اللزوجة..

الموضوع راجع لحاجتين أساسيين:

طريقة استخدامك + أولوياتك بالنسبة للعربية

إزاي؟؟

1- طريقة استخدامك للعربية

عموما... فيه حالات معينة لو بتحصل معاك كتير يبقى لازم تروح على اللزوجات الأعلى.. وهي:

1- تحميل السيارة بحمولة وأوزان عالية أكتر من نصف الحمولة القصوى المسموح بيها في الكتالوج (غالبا الحمولة القصوى بتبقى 500 كجم).

2- قطر أو سحب سيارات أو مقطورات (كرافان مثلا).

3- صعود مرتفعات أو نزولها (زي جبل المقطم مثلا).

4- القيادة الرياضية والتسابق (سيارات السباق بيتحطلها زيوت تقيلة دايما).

5- السيارات الخدمية (زي سيارات التاكسي أو سيارات دوريات الشرطة مثلا)

بمعنى إن العربية لو بتشتغل تاكسي مثلا... فاستخدام لزوجة ثقيلة أكيد أفضل... لإن في العادة التاكسي معرض لظروف تشغيل قاسية ومتنوعة (هو ورزقه كل يوم)... وموتوره شغال علطول ومش بيقف.. فعيوب الزيت الثقيل (اللي هي تأخير الوضول إلى أجزاء الموتور في بداية التشغيل) هتبقى شبه مالهاش وجود.. لإن الموتور فعليا ما وقفش أصلا.. أو على الأقل وقف مرة واحدة بس في اليوم.

على العكس من الكلام ده بالنسبة للعربيات الملاكي اللي استخدامها خفيف... فالزيوت الخفيفة مطلوبة لإن عدد مرات دورانها عالبارد (يعني كل الزيت راقد في الكارتير والكامات فوق مفيش عليها زيت) خلال اليوم الواحد أكيد أكتر.. 

أحيانا بتبقى العربية شغالة مشاوير خفيفة ولكن المشوار نفسه بتكون العربية فيه محملة أو بتطلع أماكن مرتفعة (زي المقطم مثلا)... في الحالة دي نحاول نجيب زيت تخليقي بلزوجة عالية شوية زي 5w-40 مثلا.

ما تنساش كمان إن جو مصر والشرق الأوسط ما فيهوش جو بارد زي أوروبا وكندا وروسيا... يعني أبرد درجة حرارة ممكن العربية تتعرضلها هي (صفر مئوية).. وده في عرف الزيوت ما هواش برد.. وما تنساش إن حتى الزيوت بلزوجة 20w-50 ممكن تشتغل كويس لحد درجة 15 تحت الصفر.

أوعى تغير لزوجة الزيت بمزاجك .. اختار من الزيوت اللي تنفع مع الجو اللي هتسوق فيه العربية حسب الكتالوج . . . . دايما.

2- أولوياتك

وهنا فيه اختلافات كتير بين الناس... 

فيه واحد عايز يشغل العربية بأقل تكاليف ممكنة... وفي الحالة دي الاختيار هيبقى للزيوت المعدنية غالبا.. خصوصا لو كان فيه بدائل رخيصة مغطية متطلبات الكتالوج (أغلب العربيات الاقتصادية - زي اللانوس مثلا - ما بتطلبش متطلبات عالية للزيوت).

وفيه واحد عايز يوفر بنزين فيروح للزيوت الخفيفة... وفيه واحد تاني مش فارق معاه البنزين بس عايز يحس بالأمان شوية فيروح لزيوت أثقل حبتين.

طيب هل ينفع نعمل خلطة جديدة من أنواع اللزوجات الموجودة في الكتالوج؟؟؟ يعني لو كان الكتالوج بيقول حط زيت 5W-30 أو 15W-40 مثلا...

ينفع نحط 5W-40؟؟؟ ماهو الدرجات دي مكتوبة في الكتالوج!!!

الحقيقة .. الخلطات دي غير مأمونة العواقب... ولو كانت درجة الزيت دي كويسة كانت بكل بساطة اتكتبت في الكتالوج.

ده غير إن كل كتالوجات السيارات بتقول بمنتهى الوضوح إن أي تغيير في درجات اللزوجة المذكورة في الكتالوج "يؤدي إلى تلف المحرك"..

ما قالوش "ممكن يؤدي".. لأ.. قالوا "يؤدي" علطول.. يعني نتيجة حتمية.

طيب لو العربية ماشية فوق الـ100 ألف كيلومتر... مش المفروض نزود اللزوجة شوية؟؟

في الحقيقة... الموضوع ده ما تقدرش تقول إنه مرتبط ارتباط مباشر مع المسافة اللي ماشياها العربية... لإن حالة الموتور بيحددها حاجات كتير غير مجرد المسافة اللي ماشياها العربية..

تخيل عربيتين...

واحدة ماشية طول النهار في الزحمة... والتانية ماشية كل مشاويرها سفر بسرعات معقولة...

اللي ماشية في الزحمة عداد الكيلومترات بتاعها قليل بس حالتها الميكانيكية عموما سيئة.. في حين اللي مشاويرها سفر ماشية كيلومترات كتير جدا .. بس حالتها الميكانيكية أحسن بكتير.

فالحقيقة إن الكيلومترات ما هياش مقياس رئيسي في تحديد حالة الموتور.. وإن كان ليها دخل بدون شك.

في رأيي اللي يخليك تستخدم لزوجة أعلى حاجة واحدة... إن معدل نقص الزيت يكون عالي.

غير كده... اللزوجة الخفيفة "حسب الكتالوج" أكتر من كافية.

لو عايز تفاصيل أكتر عن الحكاية دي.. ادخل على الموضوع ده

http://boriobishi.blogspot.com/2018/12/100.html