ما علاقة عداد السرعة بالتاكوميتر؟؟

كنا قد تكلمنا في مقالة سابقة عن أهمية التاكوميتر وكيفية استخدامه بطريقة صحيحة.. 

وقلنا حينها أننا نستطيع التخلي عن عداد السرعة

فهل هناك علاقة بين التاكوميتر وعداد السرعة؟؟

بالتأكيد هناك علاقة

العلاقة موجودة عن طريق مجموعة نقل الحركة (أو drivetrain بالإنجليزية).. وهي مكونة من المحرك + ناقل الحركة أو الجيربوكس + الترس التفاضلي (الكورونا) + إطارات السيارة.

فما سبب وجود هذه المجموعة؟

السبب هو تقليل الجهد على المحرك وتوفير العزم اللازم لتحريك السيارة في مختلف الظروف

في بعض كتالوجات العربيات... بيبقى مكتوب نسب تخفيض التروس بتاعة الفتيس والكورونا، ووبناء عليها بيتعمل عداد السرعة

طبعا القيم دي بتختلف من عربية للتانية

مثلا:

لو عندك نسبة تخفيض النقلة التانية = 2.5 .... دي معناها إن الموتور بيلف عدد لفات 2.5 ضعف عدد لفات العمود اللي طالع من الفتيس

الكورونا بتاخد الكلام ده وتعمل تخفيض تاني في السرعة وتوصله للعجل

  

عادة .. نسبة التخفيض في الكورونا بتبقى 4 .... يعني عدد لفات العمود اللي طالع من الفتيس هي 4 أضعاف العمود اللي واصل على العجل

فلو الموتور بيلف 3000 RPM على النقلة التانية

يبقى العجلة هتلف كام RPM؟؟؟

العجلة هتلف 3000 / 2.5 / 4 = 300 RPM

الـ 300 RPM دول لما تضربهم في محيط العجل يديك القيمة اللي بتطلعلك في عداد السرعة لما يبقى عداد الـRPM على 3000 وانت ماشي على التاني

وبالطريقة دي.... تقدر تعرف أقصى سرعة لكل غيار

عشان كده .... لو حبيت تغير مقاس الكاوتش وتجيب كاوتش أعرض ... مهم جدا إنك تحافظ على القطر الخارجي للكاوتش زي ماهو الأصلي... عشان ما يخلفش معاك عداد السرعة

العلاقة دي ممكن تبوظ في حالتين....

إن اسطوانة الدبرياج تكون بتفوت ... أو ... في حالة العربيات الأوتوماتيك لما يبقى محمل عليها جامد

...